Torsdag 4. april var det møte i Julebygda Historielag. Ola Folkvord (biletet) hadde eit interessant innlegg om uttappinga av Skas-Heigrevatnet. Dette storverket har ei lang historie. Det byrja allereide i 1864 med dei første tiltaka for å senka vassflata for å gjera ho om til dyrkbar jord. Dette var det første forsøket på senking av vatn av dette omfanget på Vestlandet.
Foredragshaldaren hadde – uvisst av kva grunn – ikkje fått tilgang til alle dokument og protokollar som omhandla den eldste delen av historia, men frå eiga erfaring frå 1960- og 1970-talet hadde han god oversikt. Operasjonen var ikkje gjort i ein eingong. Det første tiltaket var rein handamakt, sidan tok maskinane over. Etter 1945 kom ideen om eit pumpelag opp og i 1976 blei det skipa eit eige pumpelag for å få meir kontroll på vassstanden. Dei som styrte dette arbeidet blei berre kalla “Sorpekomiteen”. Dei fekk god fagleg støtte frå Norsk vassdrags og elektrisitetsverk, NVE. Det viste seg at det var store djupnar med myr og lausmassar under der kor den nye pumpestasjonen skulle byggjast – opptil tre meter med myr, så kom tjukke lag mer leire. Ialt blei det målt omlag 34 meter med lausmasse utan at ein trefte fast grunn.
Etter foredraget var det årsmøtet i Julebygda Historielag. Einar Lea blei attvald som leiar. Elles alle val etter forslag frå valnemnda.
Einar Lea blei attvald som leiar av Julebygda Historielag
Etter møtet nytta representantar frå Sandnes Historielag høvet til å ta eit lite planleggingsmøte med styret i Julebygda Historielag for å førebu sommarturen me skal ha til Julebygda 26. mai.
